Чăваш Енĕн тĕп хулинче пĕрремĕш юр ирĕлтерекен станцие хута яма тытăннă. Асăннă вырăна Трактор тăвакансен проспектĕнче йĕркелĕç. Вăл 2026-2027-мĕш çулти хĕл тапхăрне хатĕр пулмалла.
Юр ирĕлтерекен сооружени çĕр айне чавса лартнă тимĕрпе бетонран тунă пысăк хатĕр пулĕ, темиçе уйрăмран тăрĕ. Пĕтĕмешле станци те чылай пайран пулать. Юр ирĕлтерекен хатĕре, тасатакан сооруженисене, виçев лапамне йĕркелĕç. Çак лаптăк тавра йăлтах карта тытĕç. Пĕр хутчен асăннă вырăн 600 кубла метр юр йышăнаять, вăл темиçе сехетре ирĕлсе пĕтет. Талăкне вара 3 пине яхăн кубла метр таран юра тĕп тума пулать. Вăл шыва çаврăннă хыççăн хăйăрпа тăвар хутăшĕ тата çӳп-çап тăрса юлать. Ăна та тасатĕç. Юр шывне вара тасатакан сооруженисенче усă курĕç.
Çапла майпа хулари мĕнпур юра тирпейлесси экологи йĕркисемпе килĕшӳллĕн пулса пырĕ, çут çанталăка сиен кӳмĕ. Халĕ Трактор тăвакансен проспектĕнче ĕç вĕрет. Объекта 2026-мĕш çулти юпан 30-мĕшĕччен хута ямалла. Хальлĕхе уйăрса панă вырăнта 7 гектар ытла лаптăк çинче çĕре сиенсĕрлетнĕ, свай çапма вырăн хатĕрленĕ, газ пăрăхĕсене вырнаçтарнă. Пĕтĕмпе станцие тума 565 миллион тенкĕ каймалла.
Анастасия Сидорова, Чăваш Ен наци телевиденийĕ
