2024-мĕш çулта ял-салана тата агропромышленность комплексне аталантарма тĕрев укçи 200 миллион тенкĕ таран ӳснĕ. Кун пирки Чăваш Республикин ял хуçалăх министрĕ Сергей Артамонов пĕлтĕрхи пулăшусемпе грантсен ĕç-хĕлне пĕтĕмлетнĕ май пĕлтерчĕ.
«Пирĕн икĕ тĕп патшалăх программи. Агропромышленнăç комплексне тата ял территорине аталантарасси. Чăваш Ен пуçлăхĕ Олег Николаев, депутатсем пулăшнипе 2024-мĕш çулта çак программăсем шайĕнчи пуçарусене пурнăçа кĕртме 8 миллиард тенкĕне яхăн нухрат уйăрнă. Ку, 2023-мĕш çулпа танлаштарсан, 200 миллион тенкĕ чылайрах», — пĕлтерчĕ Сергей Артамонов. Укçа-тенкĕ ытларах ял хуçалăхне лекнĕ. 5 миллиард ытла тенкĕ ӳсен-тăран лартса ӳстерме, выльăх-чĕрлĕх ĕрчетме, апат-çимĕç тирпейлеме усă курнă. Пĕтĕмпе 78 тĕрлĕ тĕрев ĕçленĕ. Чи анлă сарăлнисем пĕчĕк процентпа укçа кивçен илесси, çакна тума миллиард çурăна яхăн тăкакланă. Тата хатĕр-хĕтĕре çĕнетесси — кун валли пĕр милиард ытла тенкĕ уйăрнă. Выльăх-чĕрлĕх ĕрчетессипе тимлекенсем те çулран çул ӳссе пыраççĕ. Пĕлтĕр вĕсене 642 миллион ытла тенкĕлĕх хавхалантарнă, ӳсен-тăранпа тăрăшакансене 550 миллион тенкĕлĕх. Çавăн пекех вăтам тата пĕчĕк услам пуçаракансене 400 миллион тенкĕне яхăнлăх пулăшупа тивĕçтернĕ. «Ял территорисене комплекслă аталантарасси» программăна ĕçлеттерме те 2 миллиард çурă уйăрнă пулнă. Вĕсенчен 9 ытла миллон тенкине халăха пĕчĕклетнĕ ставкăпа ял ипотекине илме, 14 миллион тенкĕ пурăнмалли условисене лайăхлатма тата 276 миллион тенкĕ 2 шкул хăпартма панă. «Халăх пуçарăвĕ» программа вара, чăнласах та, чи анлă сарăлни пулса тăчĕ. Вăл пулăшнипе 2024-мĕш çулта 1477 проекта пурнăçа кĕртнĕ. Çул-йĕре лайăхлатнă, ача-пăча, спорт лапамĕсене çĕнетнĕ, çăл куçсене тасатнă тата ытти те. Кăçал агропромышленность комплексне аталантарма 5 миллиард тенкĕне яхăн пăхса хунă. Ку хисеп çулталăк тăршшĕпе ӳсме те пултарать.
Анастасия Сидорова, Чăваш Ен наци телевиденийĕ
